كيف تختار من يصمم متجرك؟
سبعة أسئلة قبل التوقيع.
دوّرت في قوقل «تصميم متجر سلة». طلع لك عشرين شركة، ومئة مستقل في خمسات ومستقل.
كلهم يقولون «احترافي». كلهم عندهم صور حلوة. والأسعار بينها فرق كبير جداً.
وأول شي يجي في بالك: أختار الأرخص، ولو ما زبط أغير.
المشكلة إن التغيير بعد ما يبدأ الشغل مكلف: وقت ضايع، وموسم فاتك، ومتجر نصه جاهز ونصه لا. الاختيار الصح من البداية أرخص بكثير من التصحيح.
الصور الحلوة ما تكفي
أي أحد يقدر يعرض لك تصميم جميل في صورة. السؤال: هل المتجر هذا حي؟ يفتح بسرعة؟ يقدر العميل يشتري منه من جواله بدون ما يعلق؟
لا تحكم على مصمم المتجر من صوره. احكم من متجر حي تقدر تشتري منه.
سبعة أسئلة تسألها قبل التوقيع
اسألها كتابياً، في الواتساب أو الإيميل، عشان يبقى الجواب عندك.
| السؤال | الجواب الي يطمّنك | الجواب الي يقلقك |
|---|---|---|
| وش يشمل العرض بالضبط؟ | قائمة بنود واضحة | «تصميم متجر احترافي» وبس |
| كم مدة التنفيذ، ومتى تبدأ؟ | مدة مكتوبة وبداية محددة | «على حسب» بدون أي رقم |
| كم جولة تعديل؟ | عدد مكتوب، ووش يعتبر تعديل | «تعديلات مفتوحة» |
| على أي ثيم بتبنون؟ | اسم الثيم وليش اخترتوه | ما يعرف أو ما يبي يقول |
| وش يصير بعد الإطلاق؟ | مدة دعم مكتوبة ووش تشمل | «كلمنا لو احتجت شي» |
| أقدر أشوف متاجر حية سويتوها؟ | روابط تفتحها بنفسك | صور بس |
| مين بيشتغل على متجري؟ | فريق واضح وشخص تتواصل معه | ما تعرف مين |
علامات تحذرك
بعض العروض فيها إشارات واضحة إنك بتتعب:
- وعد بمبيعات. ما أحد يقدر يضمن لك مبيعات. الي يوعدك فيها إما ما يفهم، أو يبي يقنعك وبس.
- سعر بدون نطاق. رقم بدون قائمة بنود، يعني كل شي بعدين بيصير «خارج الاتفاق».
- ما فيه شي مكتوب. لا مدة، ولا تعديلات، ولا دعم.
- الدفع كامل قبل أي خطوة بدون أي وضوح في الخطوات.
- ما يسألك عن مشروعك. يرسل السعر قبل ما يعرف كم منتج عندك، أو مين عملاؤك، أو وش المنصة.
- ردوده بطيئة قبل التوقيع. الي يتأخر عليك وانت عميل محتمل، غالباً بيتأخر أكثر بعد ما تدفع.
- تصميم من الصفر لكل شي بدون سبب واضح. فصّلناها في ثيم جاهز ولا من الصفر؟.
الوضوح قبل التوقيع يوفر عليك نص المشاكل بعده.
شيك على شغلهم بنفسك
ما تحتاج تكون تقني عشان تقيّم متجر:
- افتح متجر حي من شغلهم على جوالك، مو على الكمبيوتر.
- جرّب تكمل طلب لين صفحة الدفع، ولاحظ وين وقفت.
- قِس السرعة بأداة PageSpeed Insights المجانية من قوقل.
- اقرأ صفحة المنتج: تجاوب على أسئلتك، ولا تخليك تسأل في الواتساب؟
- دوّر على اسم المتجر في قوقل: يطلع؟
الاجتماع الأول: وش تجهّز
الاجتماع الأول يكشف لك كثير عن الي بيشتغل معك. وكل ما جهزت أكثر، طلع العرض أدق.
جهّز قبله:
- شعارك وألوانك وخطوطك لو عندك هوية.
- ثلاث متاجر تعجبك، وقل ليش تعجبك بالضبط.
- عدد منتجاتك تقريباً، وهل فيها مقاسات وألوان.
- طرق الدفع والشحن الي تبيها.
- موعد تبي تطلق فيه، ولو فيه موسم تستهدفه.
وانتبه في الاجتماع: هل سألك عن عملائك ومنتجك؟ ولا تكلم عن نفسه وأعماله بس؟ الي يفهم مشروعك قبل ما يسعّر، غالباً بيبني متجر يناسبك.
وش لازم يكون مكتوب قبل الدفع
ما يحتاج عقد طويل. بس هالأشياء لازم تكون مكتوبة في مكان تقدر ترجع له:
- البنود الي داخلة في الشغل، والي خارجه.
- المدة ومتى تبدأ بالضبط.
- عدد جولات التعديل ووش يعتبر تعديل.
- مدة الدعم بعد الإطلاق ووش تشمل.
- المبلغ وطريقة الدفع، وسياسة الاسترجاع لو انلغى المشروع.
الي ما انكتب، كأنه ما انقال.
قارن العروض صح
لا تقارن الرقم بالرقم. حط العروض جنب بعض على نفس البنود: الثيم، وعدد المنتجات، والدفع والشحن، والبكسلات، وجولات التعديل، والدعم. استخدم قائمة البنود في وش يشمل تصميم المتجر؟.
وسوّ جدول بسيط: كل عرض في عمود، وكل بند في سطر. الخانة الفاضية سؤال ترسله لصاحب العرض. والي ما يجاوب على أسئلتك قبل التوقيع، تخيّل كيف بيرد عليك بعده.
بعدها بتلقى إن العرض الرخيص غالباً ناقص بنود، والفرق بيجيك بعدين على شكل «عرض إضافي».
وإذا موسم قريب، مثل الجمعة البيضاء أو رمضان، احسب المدة من الحين. متجر يطلع بعد الموسم بأسبوع، فاتته فرصة سنة كاملة.
متى تتواصل مع وكالة؟
لو متجرك صغير وتبي تجرّب، مستقل شاطر ممكن يكفيك. بس لو عندك علامة قائمة، ومنتجات كثيرة، وتبي التزام مكتوب بالمدة والدعم، تحتاج فريق يمسك المتجر من أوله لآخره.
في ڤالا نكتب البنود والمدة وجولات التعديل والدعم قبل ما نبدأ، على تصميم متجر سلة وتصميم متجر زد. بس سواء اخترتنا أو غيرنا، اسأل الأسئلة السبعة كلها.
الأسئلة الشائعة
كيف أختار شركة تصميم متاجر إلكترونية؟
اطلب قائمة بنود مكتوبة، ومدة تنفيذ واضحة، وعدد جولات التعديل، ومدة الدعم بعد الإطلاق. وافتح متاجر حية سووها من جوالك، وجرّب تشتري منها.
هل الأفضل مستقل ولا وكالة لتصميم متجر سلة؟
المستقل الشاطر يناسب المتجر الصغير والتجربة. الوكالة تناسب العلامة القائمة الي تبي فريق كامل والتزام مكتوب بالمدة والدعم. المهم في الحالتين إن كل شي يكون مكتوب.
وش العلامات الي تدل إن عرض تصميم المتجر ضعيف؟
وعد بمبيعات، أو سعر بدون قائمة بنود، أو ما فيه مدة ولا عدد تعديلات مكتوب، أو ما يقدر يوريك متجر حي سواه.
كيف أقيّم متجر سواه المصمم قبل؟
افتحه من جوالك، وجرّب تكمل طلب، وقِس سرعته بأداة PageSpeed Insights من قوقل، واقرأ صفحة المنتج وشوف هل تجاوب على أسئلتك.
ليش أسعار تصميم المتاجر تختلف كثير؟
لأن كل واحد يقصد شي مختلف بكلمة «تصميم». بعض العروض صفحة رئيسية بس، وبعضها متجر كامل جاهز للبيع مع دعم. قارن على نفس البنود قبل السعر.
وش أجهّز قبل أول اجتماع مع مصمم المتجر؟
شعارك وألوانك، وثلاث متاجر تعجبك مع السبب، وعدد منتجاتك تقريباً، وطرق الدفع والشحن الي تبيها، وموعد الإطلاق الي تستهدفه. كل ما جهزت أكثر، طلع العرض أدق.
